საქართველოს ფერმერთა ასოციაციამ, ევროკავშირის (EU) მხარდაჭერითა და საერთაშორისო კომპანია Agrinatura-სთან პარტნიორობით, სიმინდის ღირებულებათა ჯაჭვის ფართომასშტაბიანი ანალიზის პრეზენტაცია გამართა.
კვლევა VCA4D-ს ინიციატივის ფარგლებში მომზადდა და მასზე დარგის წამყვანი ექსპერტები (ჰევალ ილდირიმი, გიორგი შუბითიძე, რიკარდო ვილანი, რატი კოჭლამაზაშვილი, ნათია გელაშვილი) ერთი წლის განმავლობაში მუშაობდნენ.
ექსპერტთა ჯგუფის მიერ ჩატარებული სამუშაოს მთავარ მიზანს სექტორში არსებული რეალური სურათის ჩვენება და სამომავლო განვითარების გზების დასახვა წარმოადგენდა. კვლევა რამდენიმე ძირითად ასპექტს მოიცავდა:
- კომპლექსური ანალიზი: სიმინდის ღირებულებათა ჯაჭვი ერთდროულად ეკონომიკური, სოციალური და გარემოსდაცვითი კუთხით შეფასდა.
- ბაზრის პოტენციალი: განისაზღვრა სექტორის განვითარების შესაძლებლობები როგორც ადგილობრივ, ისე საექსპორტო ბაზრებზე.
- ბარიერების იდენტიფიცირება: მკვლევრებმა გამოავლინეს ის ძირითადი გამოწვევები, რომელთა წინაშეც დღეს ფერმერები და აგრობიზნესში ჩართული სხვა აქტორები დგანან.
- სტრატეგიული რეკომენდაციები: შემუშავდა კონკრეტული სამოქმედო გეგმები, რომლებიც ქვეყანაში მდგრადი და ინკლუზიური სოფლის მეურნეობის განვითარებას შეუწყობს ხელს.
ანალიზის შედეგების პრეზენტაცია ინტერაქციულ ფორმატში წარიმართა. ღონისძიებას სიმინდის ადგილობრივი მწარმოებლები, აგროსაშუალებების მომწოდებლები, ფინანსური ინსტიტუტების, საერთაშორისო ორგანიზაციებისა და ასოციაციების წარმომადგენლები, ასევე დარგის ექსპერტები ესწრებოდნენ.
პრეზენტაციის მეორე ნაწილი დაეთმო სექტორის ძლიერი და სუსტი მხარეების, სამომავლო შესაძლებლობებისა და საფრთხეების განხილვას (SWOT ანალიზი). დისკუსიის პროცესში შეხვედრის მონაწილეებმა იმსჯელეს იმ პრაქტიკულ ნაბიჯებზე, რომლებიც აუცილებელია მიღებული რეკომენდაციების რეალობაში დასანერგად და სიმინდის წარმოების ეფექტიანობის ასამაღლებლად.
